Tag Archives: Jesús

2850.

10 Júl

Á föstudaginn langa var Jesús krossfestur uppi á Golgatahæð. Pétur, María og lærisveinarnir fylgdust með krossfestingunni neðar í hæðinni.

Skyndilega kallar Jesús: „Pétur, Pétur…“

Pétur hleypur upp hæðina og segir: „Já, herra minn, hvað vilt þú mér?“

En þegar hann kemur alveg upp að krossinum eru þar fyrir rómverskir hermenn sem höggva hægri hendina af Pétri og reka hann svo aftur niður af hæðinni.

Nokkru síðar kallar Jesús aftur: „Pétur, Pétur…“

Pétur kemur aftur hlaupandi upp hæðina og spyr: „Hvað var það, drottinn minn?“

„Pétur, Pétur…“ segir Jesús, „ég sé húsið þitt héðan!“

Auglýsingar

1969.

23 Jún

Maó, Brésnéf og Dúbsjék voru í flugferð. Flugfreyja tilkynnti:

„Góðir farþegar, það gleður okkur að geta tilkynnt að Jesús Kristur er með okkur. Hann mun ganga um og veita hverjum farþega eina ósk.“

Kristur kemur inn og gengur til Maós.

„Hvers óskarðu þér?“ spyr Kristur.

„Að allir rússneskir endurskoðunarsinnar hverfi burt úr jarðríki,“ sagði Maó.

„Ágætt,“ svaraði Jesús og sneri sér að Brésnéf.

„Hver er þín ósk?“ spurði Jesús.

„Að allir kínverskir klofningssinnar séu úr sögunni,“ sagði Brésnéf.

„Þá það,“ sagði Jesús og fór til Dúbsjéks.

„Jæja, hvers óskar þú?“ spurði hann.

„Félagi Jesús,“ sagði Dúbsjék, „ætlarðu virkilega að uppfylla óskir þeirra?“

„Auðvitað“ svaraði Jesús, „ég er almáttugur.“

„Jahá…,“ sagði Dúbsjék, „þá ætla ég bara að fá einn bolla af kaffi.“

1167.

7 Jún

Kennarinn: „Þetta fallega og góða epli ætla ég að gefa þeim sem getur sagt mér hvaða maður var mesta mikilmenni sögunnar.“

Davíð litli réttir upp hönd og segir: „Það var Jesús Kristur.“

Kennarinn: „Alveg rétt, Davíð, og þú færð eplið. En ég hef alltaf haldið að þú værir gyðingur?“

Davíð: „Jú, það er ég reyndar. Og þú veist og ég veit að í rauninni var Móses mesta mikilmenni sögunnar – en viðskipti eru viðskipti.“

780.

30 Maí

Eiginlega átti Jesús að fæðast á Írlandi – en guð lenti í vandræðum með að finna einn vitring þar, hvað þá þrjá.

721.

29 Maí

Jesús Kristur býðst til að leysa Lykla-Pétur af við Gullna hliðið.

„Farðu og fáðu þér kaffi,“ segir Jesús. „Ég skal hleypa inn á meðan.“

Lykla-Pétur fer og Kristur tekur við. Eftir nokkra stund kemur gamall maður haltrandi upp að hliðinu.

„Hvað hefur þú gert til að eiga rétt á inngöngu?“ spyr Kristur eins og venja er til.

„Það er nú fátt,“ segir gamli maðurinn. „Ég var fátækur trésmiður og lifði óbreyttu lífi. Það eina merkilega var sonur minn.“

„Sonur þinn?“ segir Jesús áhugasamur.

„Já, hann var engum líkur. Fæðing hans var söguleg og seinna gekk hann í gegnum mikla umbreytingu. Hann varð heimsfrægur og er enn í miklum metum víða.“

Kristur starir andartak á manninn, faðmar hann svo að sér og segir „Pabbi, pabbi!“

Gamli maðurinn faðmar Krist að sér líka og spyr: „Gosi?“

534.

25 Maí

Gyðingurinn Abraham kom þjótandi heim til Samúels vinar síns og var mikið niðri fyrir. „Mikil hörmung hefur dunið yfir. Ég sótti son minn á flugvöllinn í dag og hann sagði mér að hann hefði tekið kristna trú.“

Samúel hlustaði hnípinn á harmatölur vinar síns og sagði svo: „Ég hef orðið fyrir sama áfalli. Ég er nýbúinn að taka á móti syni mínum og hann hefur einnig snúist frá gyðingatrú. Hvað eigum við að taka til bragðs.”

Þeir fóru og töluðu við rabbínann, en þá kom upp úr dúrnum að sonur hans hafði einnig snúist til kristni. Í örvæntingu sinni fóru mennirnir þrír í sýnagóguna og báðust fyrir í ákafa.

Eftir nokkra stund heyrðust miklar dunur í lofti og voldug rödd kvað við: „Herrar mínir, vitið þið hvað? Ég lenti sjálfur í þessu einu sinni.“